๐ ฮีตหนึ่งนั้นพอเถิงเดือนแปด ได้ล้ำล่วงมาถึง ฝูงหมู่สังโฆคุณ เข้าวัสสาจำจ้อย

ทำตามฮอยของพระเจ้าโคดมทำก่อน บ่ทะลอนเลิกม้างทำแท้สู่ภาย

แล้วจงพากันผ่ายไปหาของไปเทอดทอด ทำทานไปอย่าได้คร้านเอาไว้หมู่บุญ

สิเป็นของหนุนเจ้าไปเทิงอากาศ สู่สวรรค์บ่ฮ้อนด้วยบุญนี้ส่งไป

เพิ่นตรัสบอกไว้ฮีตเก่าคองหลัง ฟังให้ดีมันคักอย่าไลเดอเจ้า

จงให้พากันเข้าทำทานตักบาตร อย่าขาดแท้ไปสู่คน

โอกาสนี้ เพิ่นให้เที่ยวซอกค้น ขุดก่นขุมบุญ เอาทุนไปภายหน้าเมื่อตายไปแล้ว

เป็นแนวนำเฮาขึ้นบันไดทองเที่ยวท่อง ขึ้นสู่ห้องซั้นฟ้าสวรรค์พุ้นอยู่เย็น

ฝูงหมู่วิบากเว้นบ่มีว่าสิมาพาน เนาว์วิมานแสนสุขทุกข์หายบ่มาใกล้